| Kim Ho Wayne 的个人资料zone BH照片日志列表 |  工具  帮助 |
|
|
男人不臭[2009 MAR 22] 母親大人從小教導，言行舉止都要正正經經，外觀也要整潔，練成對自己的要求一直也頗高。中七那年，在等待極刑的暑假，得阿姨引薦，與教會一位弟兄，一同當上的「香水男」，為當時一隻全新推出的男裝運動型香水做宣傳，到各大百貨公司的香水專櫃，與一眾化妝阿姐上班三個多月，自此之後，都愛上用香水。
與很多人都一樣，我以前也以為提子味香水就有提子，木味香水就有木，檸檬味就有檸檬，錯！「香水男」培訓班第一課，導師打開一個神奇寶盒，裡面有近百枝小試管，裡面盛載著小量透明液體，如果不看標籤，你根本無法識別。其實這是各種香精油，據講，香水師每日就拿這些試管「溝來溝去」，製作出一樽樽動輒幾百元的香水。然後我又發現，很多牌子的香水，都是由同一家公司生產，雖然甲香水與乙香水咪道極之相似，但因為香水樽的設計，以及品牌所走的路線不同，可使顧客有完全不同的感受。
我用過很多款香水，也許先入為主，我較喜歡「香水男」公司所代理的品牌。與很多人一樣，我第一枝香水是 Giorgio Armani 的 ARMANI。這也是該公司打入香水市場的代表作。「香水男」推銷時，要將香水淡淡的檸檬味，說成 citrus note，又要說雖然其外型像男裝西裝，但香氣比較中性，男女合用，甚麼甚麼...... 不過，這枝香水的香氣太快就散發掉，我用完一枝就算了。
談到香水能否持久，「香水男」又有一套道理：市面上不同種類的香水，先生小姐你可以按自己喜好選擇。香水大致分為 Parfum、Eau de Parfum、Eau de Toilette 以及 Cologne 四大類。Cologne 就是大家經常講的「古龍水」了，因為香精油比重佔最少、酒精佔最多，所以香味不能持久，但卻適合不喜歡滿身香氣的人使用。以前男裝香水大多都是 Cologne，不過隨著愈來愈多男士接受香水，所以生產商都多推男裝 EDT。Parfum 正正是 Cologne 的相反，一兩滴就夠你 carry 一整天。
大家買香水的時候，可以留意香水樽上面，或者底部的標籤，看看有沒有我剛才說的四大類。不過事先聲明，那些「雜嘜」香水，就未必有如此分類，亦不建議你買。
用完了 ARMANI，我阿姨介紹我用 Polo Safari for Men，很重的檀香木味，再配上柑桔的果香，如果沒有出大汗，香氣可以維持大半天，加上香水樽設計極之豪華，所以一度是我的至愛，我更使用同系的 shower gel，感覺棒極了。可惜這個味道實在太老土，沒有市場，九十年代後期就停產了。
  沒有辦法之下，我找到了代替品：Kenzo Pour Homme。Kenzo 的設計在時裝界一早已很有名，初中時有本叫做《穿 Kenzo 的女人》的小說，不知大家有沒有看過。Kenzo Pour Homme 吸引之處，是它的外型太酷了－－橢圓形墨綠色磨沙玻璃樽，像比薩斜塔般微微傾側，樽身還有竹林和葉的凹凸花紋，儼如一件藝術品，加上一股獨特、以及隨時間而「變調」的香味，雖然到後期，樽身設計變得簡約，但我仍然用完一枝又一枝。
  為甚麼要用香水呢？「香水男」推銷時，會說香水是用來配合衣服、出席不同場合，可以突出你的形象、增強自信云云。我的解釋是首先令自己舒服一點，之後才是令身邊的人舒服一點。我甚少用香水來掩飾汗臭，因為這是無用的，反而會令自己和別人，都聞到一層層夾香夾臭的怪味。
世上沒有幾多隻香水，可以如 Chanel No 5 和綠色 Polo 般長賣長有。Kenzo Pour Homme 停產後，我一直為找代替品相當煩惱。去商店試香水都好幾次，只覺得這個年代的香水嚴重無個性，不論男女裝，味道都相似得可憐。經過多日 research，終於在「龍城」買下 Bvlgari 的 BLV Pour Homme。老實說，我並非十分喜歡 BLV 的味道，不過算是「買得落手」。希望我與它磨合多幾天，感覺會愈來愈好。
 我記得做「香水男」之時，Bvlgari 剛剛在香港興起，他們做香水很成功，頭炮兩款女裝香水，一濃一淡，賣個滿堂紅。無他，香水樽設計高貴，香氣清晰穩定，最重要的非常 long lasting。較濃的那隻 EDP，只要輕輕噴一下，如果不洗手，香氣可以留至翌日。這也是我今次轉買 BLV 的原因。
基於香水是非常個人化，所以我不會送香水。如你想用，我還是建議閣下去試味。店員通常會噴上試紙，然後給你試聞。「香水男」告訴你：這是沒有用的！人人的體溫、體味都不同，所以同一枝香水落到不同人身上，反映出來的香氣都會不同。若你有心買，必須用心試。手背、手腕都是可以上佳的試點。
注意，把香水樽拿遠一點，輕輕的噴一下，讓皮膚自然地吸收，再過半分鐘才開始聞，這大概就是你和那枝香水結合的味道。所以你可以想像，每次你最多只可以試四枝香水，要嗎決定買哪枝，要嗎就離開，改天再試。當然，在金融海嘯的日子，你大可以每天到不同的商店試香水，像很多人每天去商店「擦 cream」一樣。 男人之苦[2008 MAR 04] 真係戥「秋官」唔抵，明明自己家事，被人直播公審，雖然好多圈中人事後力撐，但其「拋妻棄女」嘅形象，已經深入廣大群眾之中，繼「丁蟹效應」之後，佢嘅人生又再多一條罪。
BH 重申，做男人，一係就盡足責任，一係就逃避到底。逃避到底唔一定要變成千古罪人，反而女方因為心裡永遠有個希望，可能無咁憎你。總好過你應承埋一大堆嘢，然後做唔到，最後恨你一世。同大家分享一宗真人真事。
伊朗有位孤寒鐸，被同佢結咗婚十年嘅老婆告，追討仲未兌現嘅嫁妝。法庭最後判阿鐸要送12萬4千支玫瑰俾老婆做賠償。喺伊朗首都德克蘭，一枝大紅玫瑰差唔多要1.1英鎊，即係十幾蚊港紙。12萬4千支，講緊成百萬港紙，喺天水圍買疊樓都得啦！
鐸嫂話，因為阿鐸孤寒成性，實在難忍，所以決定告上法庭。於是法官就拉人封艇。
根據伊朗法例，女人可以向法院提出追討丈夫認頭嘅嫁妝，即使離咗婚都可以追討，理據係嫁妝係女人財產嘅一部分。如果唔俾，就係遺反合約精神。你話，如果兩夫婦關係建基於呢啲嘢，都咪話唔心寒。
講番阿鐸嫂，佢仲向記者話阿鐸 "was very cheap... He even refused to pay for my coffee if we went to a cafe or restaurant." 咁阿鐸又衰嘅，大家共同生活咗三千幾個晝夜，十零廿蚊咖啡都唔買杯，實在那過，好心就咪鬼娶人啦。
阿鐸同法官求情時話，佢每日只可以送五枝大紅玫瑰俾鐸嫂。（除番開即係要送 68 年，怕且到佢死都未送得哂）阿鐸又話鐸嫂去告狀，完全係因為佢身邊班有錢朋友煽風點火。但法官唔接納解釋，仲暫時充公阿鐸一疊樓，直至佢送哂嗰 12萬4 千枝玫瑰為止。
BH 懷疑個法官係女人，又或者係近得八婆太多嘅男人。一家唔知一家事，法官大人唔去調解關係不特止，仲迫阿鐸去牆角，試問就算阿鐸他日賠哂啲花，兩夫妻關係都唔方好得去邊啦。鐸嫂妳又係嘅，當年相戀意中人嘅時候，又唔睇清楚阿鐸同閣下係咪大家性情近？所以，愛情唔止係盲目，仲可能有白內障、青光眼、視網膜脫落等症狀。BH 建議熱戀中嘅男女，婚前唔使去家計會，去搵林順潮得喇。
而家唯願鐸嫂見好就收，放阿鐸一馬啦。BH 對阿鐸嘅遭遇深表同情。有時男人搵錢撐起頭家，真係好辛苦吖嘛，如果可以嘅話，梗係會將自己最好嘅俾哂老婆啦，但係老婆心入面諗啲咩，又真係另一個故仔。BH 絕無含沙射影呀，只係香港地物質主義太盛，有時真係一個把持唔住，男女雙方都會諗埋一邊。但試問兩夫妻為咗錢銀反面，仲要公諸於世，引用啲師奶所言：貪好睇咩。各位唔好以為啲師奶宅心仁厚呀，佢哋真係覺得人地啲家事好好睇架！所以，BH 奉勸各位都要以阿鐸嘅故事為寶鑑，好好省察自己，有冇好好咁對另一半。無則改之，有則加勉啦。
＊有關阿鐸遭遇嘅原文，詳見 BBC 網站：http://news.bbc.co.uk/2/hi/middle_east/7275506.stm 理想對象[2008 FEB 13] 聽日又係一年一度嘅情人節，BH 絕對稱不上係大情人，但每年總會因為呢個節日而心跳加速。但實在作為一個中國人，應該為元宵節感到雀躍先係「政治正確」，偏偏我潛意識「勾結外國勢力」。不過唔緊要，近來上面放完一個又一個，相比本地衙門拉完一個又一個， BH 實在有感祖國的崛起，實在係萬民之福耶。
話說回來，情人節嘅由來有好多個講法，其中一個係公元三世紀古羅馬暴君 Claudius，要徵召了大批公民去打仗，好多男人都唔捨得屋企嗰件（或者多過一件）而唔妥 Claudius，於是 Claudius 索性唔俾人結婚。
撞啱有個修士叫 Valentine，好事多為，成日幫人秘密結婚，可能因為佢收得仲平過「法律超人」，所以好快傳到開巷。Claudius 唔抵得佢撈到風生水起，捉咗佢去坐監，最後 Valentine 喺獄中受盡折磨而死，時為公元 270 年 2 月 14 日。照咁講法，呢一日唔應該屬於拖友，而係應該留俾專幫人扯紅線嘅人去慶祝；天下有情人亦應該趁呢一日，向當年為你穿針引線、喺聚會特登吉個位俾你「上」嘅人灌茶灌水先啱。
話時話，好多時呢啲「助攻王」，本身其實好鍾意嗰個被幫嘅人，但最後就只係做一世「助攻王」，下場比 Valentine 仲慘。有見及此， BH 強烈推介一位「男中之男」俾各位未有著落嘅女仕－－普京。
呢位亦正亦邪嘅魅力先生真係非同凡響，莫講紅鬚綠眼嘅外邦，就算你而家落去街市，同班師奶提起普京，師奶們都會春心蕩漾。BH 估計，係因為普京先生所發揮出嘅剛陽之氣，就算十個香港型男加埋都比唔上。何況實際上，普京先生武功高強，一抽十都綽綽有餘。
幾年前有套片叫《男人胸、女人 HOME》，內容雖爛，但個名卻十分中 POINT。試問有邊個女人鍾意自己條仔終日上網打機睇電視，頂多都係識作埋哂啲爛 GAG 短訊？人哋普京先生一聲令下，成個國家炸個稀巴爛都仲得，嗰種對權力牢牢嘅掌控，莫講女人，連男人都敬佩。
最難得嘅係佢唔似行貨獨裁者咁，粗粗魯魯大肚林 DUM、講嘢口水橫飛，反而幾十歲人著起西裝仲 FIT 過謝賢，BH 認為啲 GYM 應該搵佢做代言人，「X 龍」「 X 城」，甚至連近期人氣急升嘅奧巴馬，統統都要收檔。美國人應該諗一諗，當奧巴馬遇上普京，即使高人成個頭，但氣勢輸走九條街嘅情景。
上俄羅斯新聞社網站，有個專題叫「普京在掌舵」，裡面唔係講佢點樣領導國家，反而只係有十幅佢「揸嘢」嘅相－－唔好心邪，係揸車、揸戰機、揸遊艇。你睇佢，揸得幾咁有型，坐佢旁邊嗰個布薯仔，即刻再扣多幾分。其品種之優越，高過嗰啲揸完揸淨就匿埋喺波士頓、曾一度都被人捧到上天嘅大淫棍多多聲。相信聽完我嘅介紹，無論閣下係又高貴又聰明，抑或係又天真又傻嘅港女們，以後都會更懂得帶眼識人。
最後，BH 都係嗰句，衷心祝諸位情人節快樂、安全、負責任；未搵到嘅快啲搵到，搵到嘅就好得幾耐得幾耐。
POP QUIZ 2[2008 FEB 11] 如果天下間只得兩種女人，一定要揀一個： 一係愛你愛到連事業都唔要，疊埋心水幫你生仔，一心一意服侍你，仲擔心你個頭會冷親，俾帽你戴； 二係廿幾歲人仲話自己好天真好傻，即使闖下大禍，仍然回敬你一個「賴伊芙」嘅笑容。 如果揀唔到，男仕們，我勸你哋不妨出家或者做神父。 POP QUIZ[2008 FEB 09] 如果天下間只得兩種男人，一定要揀一個：
一係大淫棍，搞完就算，但係間中會攞部電腦去整；
二係俾足家用養妻活兒做足本份，但出面有個阿二。
如果揀唔到，女仕們，我勸你哋買把較剪旁身。 常鵝一號[2007 NOV 01] 「嫦娥一號」順利升空，展開為期一年的探月工程，為我國航天事業超日趕美踏出重要一步。 全世界都關注這次壯舉，除了很多航天大國虎視耽耽之外，這次「奔月」行動，亦激發起世界各地的女仕們，展開另類載人探索計劃。無獨有偶，她們的計劃代號叫做「常鵝一號」。
據了解，「常鵝一號」的開展，主要是為尋找合適的登陸星體，從而展開各項研究及鑽探任務。行動總指揮，港女太多空想控制中心（以下簡稱太空中心）負責人向我們透露，這次任務將會十分艱鉅，但一定會排除萬難去爭取最後勝利。負責又表示，中心的準太空人學歷水平都很高，最少都受過九年免費教育，個別更有碩士、博士學位。
負責人又表示，「常鵝一號」沒有既定的升空時間，地面控制中心會隨時留意情況隨時執勤，但不一定會發佈行動的內容，直至取得階段性成果為止。但負責人並沒有表明甚麼是階段性成果。而為了這次任務，太空中心的科學家、工程師，特別設計了九大儀器：分別是：
１）千嬌百媚誘捕器；２）甜言蜜語播音機；３）超聲波身家財產探測分析儀；４）高解像全天候跟蹤攝影機；５）光速狐狸精分解器；６）多角度親戚朋友挑撥器；７）耀武揚威放大器；８）玉石俱焚爆炸裝置；９）絕情絕義返回艙。
綜合多位權威航天人士分析，當有目標星體移動至太空中心監察範圍內，「常鵝一號」就會發射，然後先在距離目標星體５０米外的軌道繞圈運行，若果情況許可，就會進行趨向性變軌。變軌所需的時間，就要視乎星體周邊，有沒有其他物體運行。這個時候，儀器１、２會先啟動，務求令「常鵝一號」加速進入目標星體引力範圍。但若果變軌太快，有可能會導致探測器失儀墜毀，屆時整個行動就要被迫中止。
「常鵝一號」完成變軌並與星體一同運行後，儀器３、４會啟動，開始對星體進行初步遙距探測，數據會傳送返太空中心進行分析，若發現星體沒有生命跡象，或者天然資源藏量稀少，勘探價值低，儀器９會啟動，行動亦告取消。反之，「常鵝一號」則可以在選擇在星體表面登陸，進行近距離探測。
由於世界列強都有興趣探測及發展具潛力的星體，「常鵝一號」要為空間戰爭隨時爆發作好準備。儀器５、６就擔當抵禦外敵入侵、保衛領土及主權完整的重責。一旦星體本身出現變異，或被其他的探測者入侵，「常鵝一號」太空人會先後啟動儀器８、９，取消任務並全速返回太空中心。
航天權威人士又指，一次成功的星體探索任務，往往要花好幾年，甚至更長時間，所以，星體上有充足的物資補給是極為重要。當一切穩定下來，儀器７才會慢慢啟動，向太空中心傳送珍貴的星體影像。
不過權威人士警告，過往曾經有探測任務失敗收場，原因往往是太空人在登陸星體之後不斷膨脹，加上各種儀器沒有２４小時開啟，或者失靈，例如儀器２發出太多雜音。一旦遇上外敵入侵，就會無法作出適時反應，星體有可能因此偏離正常軌道之餘，甚或會對太空人產生排斥。所以專家建議「常鵝一號」太空人要時刻與星體連繫、保持狀態，以增加其運行的穩定性。
根據最新一期科學雜誌的數據顯示，太空中具潛力的星體已買少見少，一般相信，未來太空將會展開一場競賽，各位女太空人要加把勁，為完成探測星體大業而奮鬥。 愛真偉大[2007 APR 25] 泰國首席網球手斯理查潘 (Paradorn Srichaphan) 與2005年度環球小姐格列波娃 (Natalie Glebova) 日前共諧連理。望著新聞片段，怎麼這位俄裔加籍美女，她的樣子好像似曾相識？細心一想：比華利山公主！
如果這個樓盤廣告有下集的話，不妨加入斯理查潘的角色，上演一幕搶妻記。身穿運動裝的斯理查潘，下戰書挑戰上集那位搏得公主歡心、廣告設計者以為香港女人認為這叫英俊的王子！結果斯理查潘以直落三盤六比零勝出，公主立即投懷送抱，然後再由大汗淋漓的斯理查潘，介紹比華利山有完善的網球場設施，我相信這個樓盤，不用再出動近期人氣急升的風水師，都可以賣個滿堂紅！
說回這段歐亞情緣頗為「閃電」，也很童話。兩人相識至相戀至結婚，也只不過歷時八個月。儀式雖不像傳統西式婚禮般隆重，但新娘子戴上由新郎送給她的名貴珠寶的那一刻，莫講女生，我身為男性都十分羨慕。我所羨慕的，當然是斯理查潘的球技，令他一度擠身男單十大，年紀輕輕已賺得巨額獎金。如果我有他這麼富有，我都會急不及待要迎娶這位世界上其中一位最美麗的女子。
我相信格列波娃不會貪求男方的財富，亦非被他的外表所吸引，若果上述兩者屬實，那就更為人所稱頌了。要知道，他們來自不同的國度，歷史、文化、風俗、信仰、語言全都不同，但都可以排除萬難，你說，愛情是多麼偉大！
香港人生活緊張，各有各忙，莫講吃飯，連上廁所的時間也不夠。在這個人人都在發夢要嫁個有錢人，但又不去照照鏡的畸形社會裡，要和你傾慕的人，轟轟烈烈地談一番戀愛，可能會換來以下冷冷的回應：
「有冇錢先？有冇車先？有冇樓先？住邊先？」
「結咗婚使唔使同你老豆老母一齊住先？」
「唔一定要有樓呀，最多一人夾一半租，費時你要我同你一齊供，萬一負資產咁點呀！」
「仲有，我搵幾多係我嘅事，但你要照顧我生活所需。」
「如果你對我唔好，我就搵個有錢佬嫁左佢算。」
看來，愛一個人，真的需要很偉大。也許，「偉大」在香港的定義，可能跟世界各國有點不同吧。
〔照片來源：路透社〕 吸煙的女人[2006 AUG 02] 喫煙，很多人都會，女生愈來愈會，教人不知所措。
在資本主義、港人治港、高度自治的社會裡，喫煙絕對是閣下的自由，任憑你那二手毒霧兜口兜面噴向我，我都不介意，反正在中學時已慣了被同學圍剿。我最介意的是大家喫煙的姿態。
日前午飯於瓊天用膳，一路走過長長的檯陣，嚇見乙位正與眾多同事午飯的女子，四肢鬆弛的「凹陷」於最近走廊的椅中。右手低垂，兩指夾著半根煙；冷酷的面容加上一記狠狠的眼神，廿來歲人，像已經歷了大半生的喜怒哀樂，既感慨又無奈，更有點「事後FEEL」。
「嘩！攪咩？」
雖然我從不喫煙，但我亦深明「飯後一枝煙」對普世煙者來說，是他們人生十大享受之一，但日光日白，為甚麼喫得那麼難看？
猶記得返「摩檸」的時候，見過另一位女同事喫煙的情景，感覺截然不同。
女同事平時的衣著頗趨時，都算是入型入格。路過公司吸煙「聖地」，看見她深深的、慢慢的吸一口，然後抬起頭，徐徐呼出煙圈。天花的燈光，配合高速向上衝的煙圈，造成一道光柱，映照在她的臉上。
「嘩，型！」
還有一種煙者，亦是最令我欣賞的，就是一直有喫煙，但從來都不會輕易讓人看到的。就連手指、牙縫，甚至隨身物品，都不會洩露天機。人生於世，寧被人知莫被人見，我未見過，你仍是身家清白。
「嘩，醒！」
最令我討厭的，是那些「未夠稱」但又要扮大人，卻只懂「打煙炮」的少女。上周到青衣城逛街，正在便利店門口看雜誌封面，後面突然傳來一把天真的聲音：『叔叔，可否幫我買Ｄ野？』轉身望見一個五尺四、七彩衣服、笑時還帶點幼稚的少女，兩指夾著三十塊：『可唔可以幫我買包煙？』我說：「你既然唔夠稱，就唔好學人食煙。」然後頭也不回走了。
「嘩，削！」
說到底，喫煙也不過是某兩三根手指、咀巴，和呼吸系統的一連串慢性自殺行動。女孩子，尤其是想生孩子的，還是先少喫一點，然後及早戒掉吧。尼古丁叔叔是絕對不會放過你的寶貝。
不要怪我多事，也不要咀咒我。因為，要死，都是我這種生來負責吸二手煙的人先行一步，各位大姐，你們儘管喫，我樂意為大家點煙。 肥婆我愛你[2006 MAR 15] 女人喜歡瘦，但男人卻不喜歡女人瘦；不論男與女，太瘦，一樣是槽糕的。
男人喜歡身邊的女人有點「肉地」，可樂曲線不必，但火柴人卻絕對不可接受。換個簡單的詞語，男人想見到女人「健康」，老一輩的人會稱之為「好生養」。
誠然，現代女人不一定要懷孕，但身子是需要長期調理的。如果太瘦，一旦要生小朋友，又怎能供給自己和腹中骨肉足夠的養份呢？
男人見到身邊的女人瘦，會很心痛。所以，為免天下間的男人心痛，和所有女性用餐時，我都會叫她們吃多一點。
身邊的女人太瘦，男人會被罵「呢個佬咁衰，唔俾飽飯佢老婆食。」男人十個有九個愛面子，在能力範圍之內，都不希望女人瘦。 男人喜歡稱身邊女人為「肥婆」（不管她是真肥或假肥），這是一種親切的呼喚，聽落也頗順耳，就如女人叫男人「死佬」一樣。
所以，男人可以肥，女人卻不可以瘦。 點解要擺酒[2004 OCT 08]聽過呢首歌未？唱幾咀俾你聽：點解要擺酒，亂咁0徒錢無理由，
人人為飲一杯酒，累到夫妻一世憂，點解要擺酒，恨我洗濕左個頭，求人度水
搵幫手，月尾薪金起勢扣。 話咁快，猴年已過左大半，話哂今年都係雙春兼閏月，有情人梗係想趁住今年 好年，拉埋天窗（其實更多時係有情人既父母），再加上出年盲年，所以身邊 好友紛紛漏夜趕科場。早幾日我先飲左兩餐，仲有三單等緊我。 朋友辦喜事，我當然既高興又羨慕，不過，現實既情況係，做人情令我窮 上加窮！我希望阿董生同唐司長慎重地諗諗，做人情都可以免稅，就好似慈善 捐款同供樓咁。 由細到大，我地成日去「飲」，大家對整個「飲」既程序都好熟。但當你 自己成為主角既時候，你就會明白，擺酒，唔係你所想像咁簡單。雖然我碩首 仲係單身寡佬一名，但我好有擺酒經驗，呢幾年不知幾多朋友搵我幫手，飲宴 當日仲要我做埋司儀，大小事務俾我打哂骰。係既，一對新人果晚係應該乜都 唔好理，交俾個信得過幫到手既人，自己只需集中精神飲飲食食，同埋等住俾 人玩，最緊要就係留番ｄ力洞房花燭夜先係正路。然而呢個世界邊有咁美好？ 往往就係為左「擺酒」呢兩個字，節外生枝，兩家初則口角，繼而...... 想擺一餐有頭有面既酒，傳統智慧話要一年時間做準備。因為 booking太 多，如果你係要揀特定日子，尤其是周末假期，就可能要更長時間。我勸大家 ，呢個環節真係唔好太執著，除非你立心不良，擺酒為名掠水為實，借假期之 便吸多ｄ人唻，否則如果為左個日子要嗌交，真係唔值得。 其實日子真係唔重要，因為一場婚宴成功與否，關鍵係你自懂性以來，究 竟識唔識做人。幾乎所有人擺酒都會響之前一日，再打俾佢地邀請既親友，口 果句梗係「提提你聽日記住早ｄ到」，心果句當然係「喂唔該你唔唻就早響唔 好攪到我計唔到數」。我碩首話你知，其實係無用既！即使人地幾咁誓神劈願 ，都有極大放你飛機，令你大失預算既可能。就係早兩晚，我同學請飲，一圍 檯卒之得五個人唻，其餘既大多都唔知去左邊。有個仲抵死，打俾佢問佢響邊 ，佢話「係咩？我冇收到貼，唔記得左。」哈！知到未呀，大家係收到你張餅 卡，之後先會記得你結婚咋！ 至於揀酒樓定係酒店，除左要考慮價錢同口碑之外，更多時要睇下你同你 班親友係咩底子。唔係話歧視，現實係如果習慣牛記笠記擘大個脾大叫大笑狠 吞虎嚥之流，你一廂情願，請佢著老西扮上流有哂 table manner 喳刀叉細嚼 慢嚐你果ｄ以為好高級既野食，佢一定好唔高興。一來可能唔夠飽，二來你要 佢使錢置裝，咁你應該做番人情俾佢先合理。 飲宴前梗係少不了麻雀耍樂環節，如果你有一班爛賭親友，你就要擔心佢 賭到上飯檯（事實呢ｄ情況屢見不鮮），如果係響大酒店擺，失禮既唔係佢地 ，係你。所以話，如果你ｄ親友係賭神賭聖賭后賭霸，不如諗下去「竹館」擺 酒，仲要每檯抽水，都幾盞。 解決地點問題，又要諗下開席前，另一個不可或缺既環節，就係影相！大 部分婚宴之所以唔能夠準時開波準時散場，最後仲攪到攝影師收你 extra，咪 又係你班親友囉！一個姨媽姑姐影你兩張，兩個豬朋狗友影你四張，攪攪下就 係幾十筒菲林。唔好諗住攝影師會同你用數碼機，佢實會吹水話菲林靚ｄ，然 後同你係咁影係咁影，跟住就同你逐筒逐筒計。 呢ｄ都算啦，反正高興，用錢解決到既問題都唔係問題。最多張貼寫「三 時恭候拍照，下午茶點招待，晚上八時入席」。最老套但必定會出現既情況， 就係你地兩家既父母爭住個台，係咁叫ｄ人上唻影相，你兩個都唔知招呼得邊 個，男家女家合力上演一場「台上哂馬」，後繼「五馬分屍」，未擺酒就將你 兩夫婦肢解。我碩首建議酒你地自製幾 set 紙版人，如果親友唔介意，可以 去影紙版，反正呢ｄ相都係影完就算，只要攝影技術好，都唔會好覺既唧。 影完相，又打完十六圈，輸乾輸淨，終於可以埋位開飯。問題又來啦！雖 然你好好心，寫左個座位表，又響每張檯上擺左個牌，鬼咁大隻字寫住係邊班 利益集團既檯，ｄ人仍然會自由發揮。跟住到左夠鐘開席，就總見有ｄ遊離份 子唔知何處歸位，到你想安排佢地坐番好原位，果ｄ俾左幾舊水既親戚，特別 係絕少聯絡果ｄ，就會俾最黑既面色你睇，俾最難聽既說話你聽。跟住，你就 要搵果班同你無血緣關係，但同你見面最多、兩脅插刀既朋友唻出賣，叫佢地 做攝石人，同ｄ百歲耆英，三姑六婆九唔搭八咁一齊食，令到佢地以為自己去 錯地方咁，完成呢餐喜宴。埋尾送客仲唔得閒去同佢地講聲多謝，最後你發覺 呢班朋友唔會再響你生命出現。 講擺酒點可以唔講食物！老實ｄ講句，人家俾五舊水人情你，你就唔好左 刻右扣，講真大家對飲宴呢ｄ飯局要求唔會太高，但求可以食一餐自己平時唔 會叫既「上天下海聯合國大集會」就已經收貨，萬萬唔好去攪ｄ新思意，因為 大家真係想食齊乳豬、蠔豉、鮑片、魚翅、蒸魚、燒雞、炒粉麵飯、糖水，最 緊要係囉得走既橙。只要唔好偷工減料，大家就會收嗲，期間即使有幾多精彩 玩你兩個既節目，佢地都只會繼續食食食，然後條件反射地拍兩下掌，再食食 食...... 咁樣攪你一日，即使你仲有力，睇怕都冇心機洞房，所以我唔介意大家預 先「攪掂」，擺酒果日，就當粉筆字抹左佢就算啦。不過如果你仍然係想攪一 場難忘既婚宴，我碩首都必定會為你赴湯蹈火。最後謹祝各位有情人，好得幾 耐就得幾耐啦！ 七點三十七分[2005 MAY 28]今天要加班，令原本中午下班的我，晚上七點才離開公司。甫步出公司
門口，傾盆大雨已經迎我而來。幸得同事一傘之助，大家少許狼狽的到達地鐵站，然
後我乘地鐵到鑽石山，再轉乘巴士回家。
下班時間，加上嘩啦嘩啦的大雨，令原本已經很多人的車廂變得更擠擁。我只可
以站在車長旁邊，見證他如何在雨中施展他的駕駛絕技，弄著那部龐然大物巨物，穿 越成千上萬的雨點。 旁邊的那位男士，與我一樣，獨個兒回家。車子臨駛進大老山隧道時，他的電話
響起了，不過他沒有留意， 沒有接聽。 到隧道中段，電話再次響起，他這次有反應了，不過還是不夠快，想按「接聽」
掣時，對方已經掛了線。 男士看看來電顯示，得悉這來電十分重要，隨即回覆，不知怎的未能接通。
當他準備垂低手時，電話第三度響起了。
「喂，我在巴士正在回來。甚麼？我都說我在巴士。我不聽你電話？不是呀，只
是我第一次聽不到，到你再來電時，我想接聽，可是你掛了線。當我再打給你時，那 時是七點三十七分，但是電話又轉駁到留言信箱。接著你再來電了，就是這樣咯。」 「甚麼？我說當我再拿起電話時，你已經掛了線，那我再打給你......那時，那時
正是七點三十七分，你看看來電顯示吧！甚麼？我都說是七點三七分，我為甚麼要騙 你呢？」男士仍然很平心靜氣的說。 「我都跟你說過，我再致電給你，是七點三十七分，你的電話轉駁到留言信箱，
你可以撥138去聽那段留言 ，是我的，對，138。」 「對呀，我正在回家，剛才在大老山隧道，很嘈吵，所以聽不到你電話。是呀，
我七點三十七分打過電話給你。後來我們接通了，所以我正在跟你說話。對呀，我正 在回來途中......那好啦，我到站啦，拜拜。」 男士既沒有半點激動，也沒有半點不耐煩，慢條斯理的將電話放回袋裡，不久，
車子到站，我就看著他疲倦 的一雙眼，架著沉重的眼鏡，下車回家去了。 電話的另一端會是誰？小孩子？我想不是。老人家？更加沒可能。要向他們解釋
「七點三十七分」的重要性，以及那「138」如何關鍵，簡直是對牛彈琴。他們怎會 明白那兩組數字背後隱含的意義？另一個要點是，如果是上述兩類人，我認為男士一 早就發了脾氣，又或者透過男性的溫柔，引開了話題，輕輕帶過擺平了。 所以我想對方會是一個女人。可能會是一個多疑、焦慮、精神緊張的女人。然而
這個「她」跟男士又是甚麼關係？要他像傻子般在車上反覆提及那堆數字，以證明他 所說的每句話、每隻字都真確無誤。這個「她」殊不簡單。我只希望，這個「她」不 是精神有問題那類。 如果「她」是個正常人，這位男士就肯定有問題了！或許是從前說了一些很刻骨
銘心的謊話，傷盡了「她」的心，又不知甚麼原因，「她」又留在他身邊，只是腦裡 不停產生對男士的不信任和猜疑，安全感盡失，甚至有點不理智......或許「她」被寵 壞了，對男士的要求已去到無理地步，目的是透過長期的折磨對方，換取快感......又 或者男士太過沒有記性，又沒有交帶，常令身邊的人擔心......不論如何，這段關係都 已嚴重扭曲了 。 你有沒有試過被人這樣盤問？你又有沒有試過這樣盤問人？ 女神[2005 JAN 05]你聽過這個詞語嗎？你知道這個詞語怎樣運用嗎？我很落後，因為大半年前
，才學會「女神」這個 term。
假若你是男生，你心目中的女神，會是個怎麼樣的異性？又假若你是女生，有天你被
男孩子尊稱為女神，你會有甚麼反應？榮幸，榮幸定會有一點，尷尬卻未必會有。相信沒
有一個女孩子，會單單因為被喜歡，而萌生負面的感覺。
話說回頭，原來「女神」這個寶號很好用。但凡你喜愛而又愛不得的，又或者愛過，
但已無法永遠擁有她的，都有資格成為你的女神。因為只有將她「神化」，你才可以換另
一個角度，用另一種心情，去繼續愛護、尊重、服務這一位你未得到過，又或再不能得到
的女人。還有，隨時準備為她作出犧牲。 但我認為，這個尊稱不要用得那麼早，除非你承認自己的無能。好好的一個女子，未
婚未嫁，活生生的站在你面前，即使對方可能早已有個伴，但為何不可以鼓起男性天賦的
無畏之勇，踏出一步，張開你平日習慣談工作、論時事（雖然有時夾雜著粗言穢語）的嘴
巴，將你那份無邪、純真的愛，坦白地告知你所愛的女子？反而尊稱她為「女神」，還「
懶」豪氣的讓全世界人知道（當然包括她）你對她的敬拜，狠狠的為自己劃上一個交叉，
但又卻在交叉背後，偷偷嘆息。
藉口總會有很多：我沒有能力給她幸福、我的性格與她不配搭、我有臭狐、她太美、
我站在她面前覺得自己很「yarp」、我腳頭不好、我是她身邊最無條件的男性、我的時辰
八字生肖星座與她不夾、她是我的好兄弟、示愛後會連朋友都沒有得做......
說到底，結論只得兩個：一、你自卑；二、她不是你最好的選擇，只是不知為何，那
杯茶都未出現，這個女子的生命軌跡，卻與你輕輕相碰，泛起過一道漣漪，你因此動搖了
你的價值觀，亂了陣腳。幸好不是發生海嘯，否則你不知會被沖到哪裡去，能否活命還是
未知之數。
更不可思議的事卻繼續發生，身邊的甲乙丙丁，卻會因為你為她「封聖」而祝福你，
說你是蒙福敬虔的愛徒。
我姑且登上天庭，為那些女神傳話：『或許我現在對你沒有感覺，但我從來沒有講過
我不會喜歡你，只是你無膽，你這樣封我做你女神，令我少了你這個機會之餘，其他可能
喜歡我的男人，都會因為你的緣故，而不敢追求我。』
你說，你有多討厭。 |
|
|
