| Kim Ho Wayne 的个人资料zone BH照片日志列表 |  工具  帮助 |
|
|
寫在悠長假期之前[2009 MAR 16] 奉天承運、老細詔曰：凡假期大戶者，立即銷假，不得抗命，違者殺之。想不到我也有份。
回來四年半，在良好的制度和長期充裕的人手下，我累積了七十多天補假。從前，在某些人眼中，這麼多假期教人羨慕，想起有朝一日，可以痛痛快快地行使時，就會很興奮。但現實是我從來沒有機會行使，漸漸地，習慣了長時間工作，習慣了持有這種期貨。
但當期貨要被強迫到期、變現成實物的一刻，感覺只有無奈。因為你深深了解在管理層的眼中，你和你的寶貝只是他們的負累。若要留活命，就必須多合作。
放假對我來說暫時沒有太大的意義。一來我仍要每晚回來讀新聞，根本不可能遠遊；二來我又暫停了進修，多出來的時間，也許會找外快、多做運動、籌備婚禮，最重要的，還是可以多點回家見爹娘。但老實說，我根本不想放假。因為放假只是一個最消極的回應，不但無助解決經營困難，更有可能將情況進一步拖垮。 過往我們在打拚，即使待遇不及其他人，但也不計較甚麼。因為我們以為，觀眾雖然不欣賞我們的製作，但仍接納我們的誠意。但這半年來的風雨，這公司的聲譽低得不可再低，就算一個不看電視的平民百姓，都會懷疑我們頭上那班人，是否真的有心再經營下去。
作為一個低層小職員，我們感受到的，是來自上層不斷要求瘦身的壓力，還有來自同行以及外間的冷嘲熱諷。辦公室像鬼屋，每天回來，都聽到一個又一個的裁員減薪傳聞。「你，無事丫嘛」、「執咗佢啦」，一字一句，聽罷只有心痛，還要強裝很有尊嚴的回應這些攻擊。
我對Ａ記有感情，我身邊的朋友同事最明白。雖然它沒有給我太多愉快回憶，而且好像還欠我很多東西，但畢竟這裡是我長大的地方；我對這個行業有憧憬，打從報讀樹仁的一刻，我就被那種使命感充滿，從來沒有放低過自己作為記者的責任。人生往往就是這麼反智，你愈想玉成好事，你愈要吃苦頭。偏偏有很多人，不管能力在你之上之下，只是打份工心態，得到的比你多十倍百倍千倍。
我開始懷疑，由小學開始灌輸人生價值觀的課本，以及古代聖賢教人追求真善美的典籍，統統都是毒藥。我恨王維基沒有善用自己在位的時間、把握機會，高估了自己、低估了他人，結果弄至今日大家都輸的田地。
有些同事想搞工會，爭取合理權益。聽得出，他們既不想離開這裡，還心存希冀，希望公司可以待他們好一點。這個想法多麼戇居！幾個月來連番裁員行動，那個聲稱扮演記者工會角色的香港記者協會都無動於衷，那班每日與你並肩採訪的傳媒同業都在幸災樂禍，那些自命經歷過行業高低潮但仍然健在的管理層，只懂不停將上面的壓力完全交託給我們的時候，我們還有甚麼可以做！
就如滙控股民一樣，不論事情有多壞，當你對一件事、一個人、一間企業、一個行業發生了真感情，你就注定要陪她一起受苦，即使受苦也覺得很甜。
可幸的是，滙控還有回升的機會。 2008 辦公室最後佈置
Well, 不停做會癲, 唯有佈置一下張檯, 添一點節日氣氛, 補祝聖誕並賀新年。 歷史會記住呢一刻（圖片來源：商業電台） 就算歷史唔記住，我都會記住。
有啲嘢[2008 NOV 12] 呢個禮拜已經過咗三個工作天，我覺得有啲嘢。點解？點解呢個禮拜我無哂啲「爛 gag 感」？點解好似力不從心，硬係無上個禮拜咁 creative？點解我感到有壓力未解決？點解我覺得周身唔聚財？點解啲九無領導行過時，我總係覺得佢有心玩我？好唔安樂，好唔自在，好無安全感，阿們。 無得等[2008 NOV 08] 近日個腦好似食錯嘢嘅腸胃，不停有嘢出。我真係好想睇吓精神科，做埋磁力共振，check 吓個腦邊忽出咗問題，令我喺咁惡劣嘅環境、公司對我咁「好」嘅情況之下，我仲可以咁 productive。
睇完蔡東豪喺壹仔專欄，諗起早兩日喺 cnateen 我同新人類嘅一席話，竟然有相類似見解。
新人類出年畢業，正為自己一出身就撞正個金融海嘯而煩惱。新人類有墨水，對呢行亦有抱負，但 BH 仍唔客氣兜頭潑佢冷水：要有心理準備，想做乜總物總，由而家起計，至少要等三十年。
BH 條數係咁計嘅：而家喺行頭話事嘅，全部都係四十尾五十頭，佢哋做老細只不過做咗十零年，距離退休仲有十零年時間，一個唔覺意賴死唔走，即係要二十年後，先有新一代老細上場。所謂嘅新一代老細 candidate，估計都係來自我呢個年代嘅人，到上位時怕且已經係五張，如果又賴死唔走做十零年先交棒，新人類要做大做頭，即係要等到 2040 年左右。相信除咗個腦同我一樣有問題嘅人之外，呢個年代唔會再有人肯投資咁 Q 長時間，去做一份完全搵唔到錢，又無滿足感、社會地位超低嘅工。
唔知新人類聽完有咩感覺，BH 唔係特登要嚇佢，但現實就如蔡東豪所講，baby boom 一代，時至今日都仲係覺得自己好緊要，無咗佢哋個世界會冧，好衰唔衰又唻個金融海嘯，再加上人愈來愈長命，所以佢哋死都唔肯起身。這亦解釋好多 BH 入行時認識嘅師兄師姐，費 Q 事同 D 老人院友鬥長命，近年陸續離開自己曾經心愛嘅行業，轉行生仔享福去也。
喺惡性循環之下，BH 這一輩，有耐性就要等，無耐性嘅都係要等。等到自己條戰鬥值曲線開始回落，先發覺自己原來又唔夠後生嗰班咁搏，個腦又開始塞塞地，卒之成為二戰後最失落、最失敗的 generation。「三張會」嗰類 so called 才俊，好想搵位企、攻陷老人院城池，但現實係班院友不單只唔放佢哋在眼內，即使係同輩，都對佢哋無信心，「try my breast」就係最佳例證。
聽日係我返老周四周年，四年前，意氣風發補錢走人，點知未返工就中咗蠱毒，所以走咗一條好奇怪嘅路。過程雖然充滿挑戰，亦都學到唔少嘢，但最後我仍然係原地踏步。無計，蔡東豪篇文叫《請多等一陣》，但計我話，根本就係周星馳話齋：少林功夫真係無得「等」，真係「呻」！ 好 CHOK[2008 NOV 06] 美國大選都過咗，奧巴馬都贏咗，個爛鬼 special 又完埋，人哋架飛機都就唻返到，但 BH 條氣依然好 chok。
如果我無爭取過，咁無份做就抵死無怨。我做哂功課，第一個仆倒去報名，到頭來我一丁點都無份參與。仲問我係咪唔開心，就係衰在我無答你唔高興，所以就自作自受，搞到今時今日仲係唔忿氣。
另一個同事又有事（當然我唔怪佢），搞到呢個星期要一拖一，又要顧節目，又要顧住被人喝住入廠讀一分鐘咁大把新聞，仲要搞埋嗰啲唔知有無錢收嘅擦鞋嘢。返唔到學，讀唔到書，做唔到功課，無時間食飯，去廁所要跑，晚晚做完個節目，條頸實到好似被人鍊咗幾個鐘咁痛，要抖成個鐘先有力返屋企。到底係我自虐，令係你哋虐待緊我？點解政府推行五天工作，BH 卻要日日返工業村，係咪大埔同好勁花園好近？係咪好近我就要日日咁擁護公司？
奧巴馬 47 歲做總統，咸美頓 23 歲做世界一級方程式冠軍，「猜賣 Breast」32 歲都做尊貴議員，試問再過四年就三張尾嘅 BH，仲有無你班仆街口中所講嘅「機會」？既然我咁勤力日日返工，秒秒鐘幫你班死鏟搵錢，點解我最後就係成日做蛋糕底、做火箭推進器？點解嗰啲「你個 Case 唔係好難搞」嘅嘢，搞咗成年，個市由好景變到金融海嘯都未搞到？
與 Chezmabelle 傾開佢母校搞咗個傑出傳理人頒獎禮，佢似乎有點意見。我同佢講，係因為馬料水嗰間搞「造星」搞得成功，所以佢母校都要學。之後我再同船底台大師姐講，我 N 年前已經提議我哋讀嗰間 「翕耷嘢」有樣學樣，話哂我哋新聞系都叫歷史悠久，可惜從來無人理我，淨係識得做埋哂啲唔湯唔水戇居 Mentorship。大師姐話，如果真係搞呢啲獎，BH 實有份。我問佢，咁人哋點寫我 PROFILE？不如咁寫：
「BH WAYNE，入行以來，一直紮根於行業基層最深處，十多年來，曾於多家傳媒機構服務，工餘積極參與記協會務，致力於行業發展，維護從業員權益，特別在協助推動年輕同業上位方面不遺餘力、計有 XXX、XXX 及 XXX，盡顯其無私、老襯、戇狗狗的專業精神。」咁好唔好？
係，我發晦氣，仲要好晦嗰隻，你吹？發老爛係我哋呢啲下等人嘅權利，你唔恨得咁多。唔好再讚我，唔使再安慰我，每一句好聽嘅說話，入到我耳仔都變成十級噪音，好討厭。 給友人 FACEBOOK 的一個回應[2008 MAR 11] 前言：友人撰文，慨嘆同事離職，以及 BBC 主播 MOIRA STUART 離職一事，忽然感觸起來。友人的言詞，激發 BH 積壓在心中多時的鬱氣，遂長篇大論抒發一番，可惜 FACEBOOK 不容許我詳談，唯有將下文節錄給友人，復把全文在此刊登一次。
------------------------------------
本來今日都想響自己 blog 寫 anchor 既野, 咁就順道響呢度亂 up 一番.
如果係因為有更好既出路等緊自己, 或者已經去到呢份工既盡頭, 再無突破, 甚至已經走下陂, 走, 係好理所當然. moira stuart 離開 bbc 仲會有人替佢不值, 但呢個世界只有一個 moira stuart. 香港唔使旨意會有.
白 d 講, d 總監睇咩, 係睇邊件女樣靚身裁正後生易呃; d 觀眾睇咩, 係睇報新聞以外時間既你; d 同事睇咩, 係睇你幾時賴野攝你個位, 之後再睇下幾時可以借呢個平台走出去.
新聞專業, 專業何來? d 故仔有幾古靈精怪得幾古靈精怪果 d 就叫「愛將」, 有幾分姿色, 但乜都唔識果 d 叫「主播」, 響呢行黐乾黐淨然後出去開 d 唔知乜鬼野 course 收人地幾千蚊一位, 間唔中又借機數臭舊公司舊同事唻抬高自己果 d 叫「成功人士」, 諗到無野好諗, 囉新聞部去當搖錢樹果 d 叫「創意」, 果班一日響討論區估今晚邊個讀新聞果 d 叫「目標觀眾」...... 你會以為咁樣既生態, 你可以做幾耐.
我今日編 24 cast, 個 anchor 讀南韓圜讀左「環」, 我好心教佢係讀「圓」, 佢用一個好不屑嘅表情, 隔住個 off mic 回應, 教番我話兩個音都有人讀, 我做左十年既「經驗」, 都比不上呢件過氣硬照 model、讀左兩三年都仲係將所有 N 同 L 掉轉既 so called 主播既「氣焰」. 復令我諗番起, 自己點樣幫手湊大果幾件小花, 幫佢地補習時事, 同佢地糾正懶音, 最後睇住佢地個個撈到風生水起, 自己就被人投閒置散, 最後仲要被人落毒誣衊, 到今時今日仲係苦海求生既散仔一名, 個心酸到唔可以再酸.
如果 moira stuart 見到, 我估佢會叫大家唔使再為佢咁興, 因為相比起好多行家, 佢已經賺夠、賺盡了.
而你亦已經好幸福了, 趁仲有大把 buffer, 應該去盤算自己下一步應該點走. 而家諗左可以唔 action, 但千祁唔好等到無哂 bargaining power, 或者個腦被短暫既好景侵蝕退化先至諗.
唔好意思, 我都知好長篇, 但字字肺腑, 句句真言. 過度充實非人生活謀財害命 ScheduleFEB 27 - DAY OFF
0530-0915 讀 morning
1400-1700 趕功課
1830-2130 返學
FEB 28 - 0930 SUB
0530-0915 讀 morning
0930-1900 編 24 cast
MAR 01 - LATE SUB
0530-0830 讀 morning
1400-1700 考 mid-term
1800-2400 編 LATE
MAR 02 - LATE SUB
1400-2400 編 LATE
MAR 03 - 0930 SUB
0530-0915 讀 morning
0930-1900 寫稿
MAR 04 - 0930 SUB
0530-0915 讀 morning
0930-1900 寫稿
．
．
．
究竟仲可以捱幾耐？
．
．
．
你哋有冇人想同我交換？ SPARE ME 十七世紀的工作流程
十八世紀的器材設備
十九世紀的薪酬水平
二十世紀的人力資源
＋ 廿一世紀的戰略思維
－－－－－－－－－－－－
＝ 廿二世紀插人兩鑊
COME ON, SPARE ME !!! Inspiration : 純屬巧合[2007 OCT 22] 終於解開公司新 LOGO 之謎。
咁就使咗一百萬，抵。千祈唔好話俾人知。 次按風暴新論[2007 AUG 15] 美國次按問題逐漸演變成信貸危機，相信唔少人都已經感受到「次按」所帶來嘅影響，當然，現階段唻講都未至於損手爛腳，但破壞大家炒到「慶合合」的雅興，已經夠哂無癮。我同大家講，如果你夠膽而家入市撈貨，我 BH 敢包你輸乾輸淨。
不過大家無留意到，原來次按風暴幽靈，已靜俏俏走入辦公室，即將掀起另一場危機。
環顧辦公室四周，大部份人營營役役，都捱唔出頭來。但總有少數人士，能夠唔使點做就有糧出，或者只要經常黐出黐入，就可以名成利就。佢地嘅成功，除咗擁有七尺厚顏、三吋長舌，同一世夠運等「市場因素」以外，原來還靠著一班「次級員工」作為他們的後盾。
次按問題源於次按公司唔理三七廿一係咁做「窿」俾啲窮鬼，然後再打包成不同風險級別嘅債券，再賣俾對沖基金同投資者，藉以分散風險。同樣道理，辦公室亦透過呢個過程，就算上層幾咁好高鶩遠，吹水唔抹咀，開好多空頭支票，佢哋嘅「責任」同「風險」，都已經透過包裝成唔同嘅任務、Project、Assignment，卸哂落為數甚多嘅下層，而「次級員工」，就係下層結構裡面最低最低嗰層，負責填補所有因人才流失、傷風感冒、突然有事、放假叉電等不同人為原因而造成嘅漏洞。
而為咗令機構及上層對外形象不至受損，官方（官腔）亦如聯儲局一樣，不停牛頭唔搭馬咀，記者問次按風暴有幾嚴重，伯南克照答「我最關注通脹問題, HAVE SOME TEA, LADY?」
這批「次級員工」沒有合理待遇，沒有明確返放時間，沒有發言權利，但卻在辦公室裡面，深得各人嘅「擁戴」，大家都好樂意同佢哋「分擔」工作。或者因為呢個原因，次級員工往往有個錯覺，以為自己終有一日會變成上層架構。
我們讀了不少歷史書，都有提及統治者無能，平民百姓就會起義造反，成功推翻王朝，建立美好新世界。但這些深入人心的經典，原來統統都是「如有雷同實屬巧合」。歷史一次又一次沒有重演，當上層的壓搾去到某一點，次級員工已無法承受時......上層仍會繼續壓搾，使次級員工問題會繼續惡化......
市場人士不斷估算，次按危機對投資市場的破壞程度，但最終都得不出一致答案。不過，估算還估算，上層架構扮完憂鬱之後，每日放工仍然係三五成群「HAVE SOME TEA, LADY?」次級員工嘅情況相信比次按更不滯，因為市場清楚知道，次級員工危機即使爆煲，唔會似次按咁波及其他層面，因為爆嘅，就只有次級員工自己。 小示一則[2007 AUG 13] 各位朋友，如無意外，九月中我會轉組，告別財經，到外電組去了。
不用覺得突然，懂我的人都知，今次距離上次轉工將近３年，又打破我個人紀錄了。何況今次只是轉組不是轉公司，行政上，我仍然繼續創紀錄。
早有轉做 SUB 的想法，只是思前想後，又以為自己可再待幾年，所以下不了手。期間的求職行動又一直沒有起色，半年來，一直處於煩躁不安之中。
立場已很鮮明，要求亦很清晰，奈何任憑我呼天搶地，都是沒有回應。所以，既然時機一到，此時此刻作個決定，一切反而來得自然。
要多謝那個累我被人錯怪一場的實習仔，如果不是他，我都不肯面對現實。
如果不是他，我都不知道原來人與人之間的信任，原來這麼脆弱；不知道人愈上愈高，眼和心就會變得愈迷糊。
與其留在藩籬，等著別人支配，不如趁自己還有餘力，釜底抽薪，冒險去多試一次，重新掌握自己命運。反正，原地踏步與走出去，人家對我的印象都一樣。
打從第一天起，我就已經是鍾無艷，所以，我不會妄想自己有天會變成夏迎春。
跟其他人相比，我保住了我的尊嚴，保住了人們欣賞我的地方。雖然，勢利現實的世俗未必這樣看。
實習仔在他的網誌上，為他所作的感到悔咎。我告訴他：「現在你仍是學生，可以做錯事，可以返轉頭，出到社會，就不會有優待，往往恨錯已難返。」對這位萍水相逢的小子，我用過心，用過力。希望他也像我一樣，用心用力去記著我的說話。若果能夠因此令他的人生變得更好，那一切都值得。 不想做好友[2007 JUL 05] 「晏架」與「機器」的分別，在於是否懂得發現稿子裡面的問題，也就是所謂專業。但近來我作為「晏架」這個專業愈來愈受挑戰。有時，真想放棄一切堅持，平平淡淡做個「機器」就算。
新聞報道著重的是甚麼？容許我將講師的幾字真言抬出來：客觀、公正、準確...... 像我這等固執的人，這幾字真言，就像晶片，一植入腦裡，就永遠在體內運作。當腦部接收到有奇怪的稿子，就會自動發作，令眼睛及咀巴產生排斥，不想看到亦不想去讀這些稿。
究竟我們報道新聞，有沒有需要，或有沒有資格，去寫某隻股票超額認購幾多倍、孖展反應如何，或首日升了幾多後，復加「反應未如理想」、「令市場感到失望／驚喜」、「破天荒」之類的詞語？最近更甚者，有稿子賜封某隻股份為「新股王」，我向編輯請示刪掉這一句，因為我真的不想讀。
如果強要投資版那一套，搬過來電視新聞，那究竟有沒有影響到我們的中立性？當這些被我們的稿子有意無意唱好或唱啖的股份，一旦出現與我們報道相反的情況時，我們又有沒有足夠膊頭去承擔？就算我們有能力去承擔，到底寫事實（FACT）以外的東西，又是否我們的份內事？我們到底在寫財經新聞，抑或與股民「炒埋一份」？
早前去看病，醫生問我做盛行，我答他我是財經記者。他向我打趣說，最近我應該大有斬獲，我回答他我甚麼都沒有買。醫生聽了哈哈大笑。看來我身邊的人，要有心理準備，可能要陪我一世捱窮。 恐怖一周[2007 JUN 23] 我肥獅大隻，平時睇落好打得，無病無痛當然好地地，有起事上唻就一定好大鑊。
好耐無試過感冒，今次仲要係重症！連續三日不停發燒、發冷、發燒、發冷，腳步浮浮，暈下暈下。最慘就係撞正返早更嗰幾日先至發病，簡直係折磨身心。
燒到根本瞓唔到，令到本來已經好差嘅情況，再衰多三錢。
你或者會問：唔可以請假嘅咩？我都好想請。不過，我手頭上嘅嘢，又係咪可以隨手就交低俾人呢？再加上跟緊隻５分鐘故仔，衰到星期四 SICK LEAVE 返到屋企都要繼續追訪問，終於追到天黑先追到。係，係有一份成功感，不過，未回味完，兩行鼻涕已經 HUR HUR 聲流落唻。
星期五，病入膏肓，我竟然可以完成返早讀新聞、做四個訪問、寫完５分鐘稿等多項任務，就算俾平時身體健康嘅我，都未必做得到。全靠一有空檔時間就伏低，或者喺巴士度瞓，終於，七點收得工。
值得留意嘅係，星期五我本來係 AL。但由於要屈服於高高層嗁淫威底下，我 06 年剩餘六日 AL，亦只可以喺「假照囉，工照返」嘅情況之下度過。所以，奉勸各位年青人：要做，就做大佬；做唔到大佬，都起碼要用盡千方百計呃個 SENIOR 位返唻。因為攝石人、鍾無艷呢啲腳色，係唔會有副手嘅。
最諷刺嘅係，新股東上場開記招時有個 BITE：「係，我哋知道亞視嘅員工，不嬲都做得好辛苦。」
你知個屁！ 我係咪有自虐狂？抑或我對新聞工作太有熱誠？又或者係咪我太發錢寒，寧願唔要命都繼續做做做？睇住隔離幾個 BLOG，逐個逐個行家老友「跳車」，我夠膽話自己仲鍾意做新聞，但真係開始覺得自己做唔唻。都係嗰句，有工，唔該彈過唻。 精神衰弱[2007 MAR 26] 無辦法再自吹自擂是「後生仔」，體力真的大不如前，返了一整個星期早更，已經疲憊不堪，更陷入精神衰弱的困境。
凌晨二時五十分，忽然醒來，看看床尾的鐘，第一個反應竟然以為鐘沒有電行慢了，於是急急起來，前往梳洗途中，望見電視機頂的鐘及錄影機的時間，不約而同地顯示時間為二時五十分，還要再想多一遍，才確認自己是「起錯身」，於是很頹喪的返回床上再睡片刻。
順理成章，今早的表現又令人失望，又在即時訪問環節的 ENDING 說錯了節目名稱。
這一次精神衰弱，始於上周五。話說當日放工回家午睡，至傍晚六時四十五分，同事 C 來電，說新聞處找「金錢」的同事。
六時四十五分，正是晨早經濟快訊第一節的開場時間！我再望向窗外，看見天色不明不暗，下意識地認為自己「唔知醒」，同事問我的問題，我都不知答了甚麼。只顧急急掛線，然後再致電公司找早晨拍檔，當然，此時他已經下班，接電話的同事 J 故此亦不明所以。
已是事發後五分鐘，我才知當時只不過是星期五的下午，但受驚的心情就一路放不低，一直橫跨周末。
愈來愈討厭要過這種生活，討厭那些「有 SHOW 錢喎」、「阿邊個之前都係咁啦」這類似為安慰實為不了解我心情的說話。反過來，如果我可以被這些說話說服，我就變成貪錢的狗奴才。「坐房」的沒有說錯，鍾無艷就是鍾無艷，別奢望半分鐘十秒鐘自己是夏迎春。
要認命，還是不認命；講義氣，還是不講義氣，我還在掙扎。正如早前跟友人訴說：男人，有時都想不負責任。奈何，回歸本文開首，自己不再是「後生仔」，眼前有很多事情等著做，而每一個決定，都要想得通透，顧全大局。 認命[2006 NOV 27] 又一個同事離開。只是短短廿四個月，一張規模原本只有六個人的DESK，「起身坐低」者竟有約三十人！試問還有哪個地方可與這裡相比？
早幾天，化妝間同事已急不及待打探，同事M走了之後，她兩日「摩檸更」會否由我頂替。有些較友好的更直截了當的說「最好係你啦」。雖然我口口聲聲「唔會掛」，但實際上，我知道這次一定不會少了我的份兒。
順理成章，攝石超人繼去年及前年冬天之後，再度出動了！
打從中學時代，我已經認清自己是這一種命：不是好正選卻是一個好後備，當別人副手總勝自己擔大旗。NBA都有「第六人」這個位置，足以證明天生我才必有用。
過往打完齋唔要和尚的遭遇，曾使我耿耿於懷，不過每當疊高枕頭仔細地想就會發現，做後備、做副手，總好過做觀眾。
受人二分四，人家叫我做甚麼，我從不推搪。或許是處女座的性格吧，不懂拒絕之餘，還會用盡自己方法，去完成使命。當然，過程中我經常愛於人前嘮嘮叨叨。請各位多多包涵，因為這也是處女座的特點。
下個月中，還要頂替同事S做講股節目，到時又可以扮專家！如果你是我，你就會知道，有時參與一些份外事，又不用負太大壓力的時候，其實都幾有趣！ 眼火爆[2006 OCT 25] 已經好耐冇出過去採訪，殊不知一出去就撞正大單野。對我唻講無咩事，不過故事主角就慘啦，「首航」變「投降」，我變相做左人家掃把星。真係諗都冇諗過，航空界都有呢種咁兒戲既事情發生。究竟係因為Ｄ咩而令到架飛機唔飛得，個個都唔蝕底加把咀，邊個講既係真話，無人知。只可講句商場如戰場，如果話呢單野只係一場誤會，信果個正白痴。
不過，我更緊張呢單新聞究竟點樣攪，結局真係令人欷噓。
做新聞，見光死，一攤牌，是龍是蛇，三歲細路哥都識睇。唔使講，都知邊個做得最曳。
早幾日人地邀請我地台報名做今日單野。我自己 PA 開緊呢個故題，當然緊張要去採訪。其他人，個個闊佬懶理，好心提提佢地人地名額有限，得來係「咁你幫我做埋佢」。好，反正手板眼見工夫，又唔係做唔唻，可以幫手何樂而不為。
去到現場，見到人地台三人組，買埋機票做埋乘客一齊去英國，當時大家第一個反應都係「使唔使呀」。哈，整定，就係咁被人做大獨家。
都唔緊要，反正無人會預計有ｄ咁既情況，非戰之罪。但電話忽然響起，公司打唻：「喂人地做緊拉闊，你可唔可以都做番個電話報道？」
之前打鑼打鼓叫你地做，你地就嘆慢版。領左野，睇住人地做，就叫我死跟。喂阿大姑，人地響機艙入面見到哂情況，梗係有得做啦。我地唔同喎，響閘口隔住道玻璃，望住部「紅白機」乜野料都冇，做手指呀？唔通豬嗡話入面點點點。就算係要做，都唔係因為見到人地做，然後就叫ｄ細既，打唻叫我做！
好啦，人地獨家人地威，咁你地響入面都要配合先得架，起碼都做ｄ最大路既「reax」填下窿，咩消委會、旅行社、立法會交通 panel 都執兩個啦係咪？隔離都仆到咁去做哂啦。喂你地又唔做，出到唻隻故仔真係......唉！我唔好意思入面幫我手 pack 果位同事呀。
講番現場，唔知我係咪太耐冇出唻，個世界已經唔同左。ｄ人好奇怪，大家都響現場，但就好似唔知要做咩咁。我見到馮國經，梗係第一時間撲過去扑咪，竟然有人係全程唔知去左邊，事後又要發動大家再扑一次......唉，係我唔好，唔跟而家規距做野，都唔知有冇人會嬲我，唔等埋一齊扑......
最攪野既係有個小朋友，扑完之後同我講：「佢講既野有咩用唧」。喂機管局主席講野無用咁邊個講野先有用？既然咁無用，你又唔知響邊度涉支咪埋唻？人人趁人多去做扒佢就唔做，好啦ｄ人上哂機，個場吉哂，就話嗌做扒。喂小朋友，你想點呀？喂小朋友個老細，你冇教人地點做記者既咩？
好彩唔使再做 daily，如果唔係，望多兩眼都會激到爆血管。
老實講，若果睇完呢篇野，覺得我講緊果個係你，咁你真係要好好檢討下。就算你憎我、覺得我串都好，我都只係想講真心話，好言相勸唧。 爆[2006 AUG 01] 我今日好興，好Ｘ興，興到爆！
由朝等到晚，個個當你透明。你如果係做野，我唔介意，但係你地係響度
玩，我就好唔開心。人人都有個位，點解係要咁樣對我？係咪因為我執得乾淨
企理，係咪因為我有一條ＢＢ線？係咪因為睇死我唔會嬲，而變本加厲？
公司係細，環境係惡劣，設施係缺乏，不過未至於要咁唧。你地想點，打
個電話俾我，只要係我能力之內，我幾時有話托手肘？但你問都唔問一聲，仲
要我番到唻都仲係當無事發生，我接受唔到！
唔好同我講：『你要咪出聲囉！』我從來都唔會亂掂人Ｄ野，亂坐人地Ｄ
位，即使試過唔問過你地就鵲巢鳩占，見到你地返，我都一定會主動死開。咁
係咪換轉時，要我開聲去乞番自己個位丫？
順帶一提，甫入家門，屋內腥臭無比，冷氣都開唔到。我真係好想一問：
呢Ｄ係咪就叫做「樂趣」？咁樣既環境，點解仲可以忍得住？點解要我陪你一
齊臭？點解一直係無動於衷？我真係好嬲。點解我跛手跛腳果陣，都仲係要我
吸塵拖地？
老實講，平日返到去，已經即刻想擰轉頭行番出去。返到公司，我真係萬
二分珍惜、疼愛、迷戀、貪圖自己個幾十呎地方。起碼果度絕對唔會有腥臭，
唔會污漕躐躂，唔會發霉，Ｄ野唔會四圍「劈」（好可惜原來都唔係）。
你地幸運，返到屋企有爸媽兄弟姊妹工人幫你執，但我條命，係全日廿四
小時都要幫人執手尾，仲唔可以發老爛！（因為發完之後都係我自己做！）
我唔介意同我身邊既朋友同事分享我既一切（係咪想話我咁樣諗，根本就
唔明白呢個世界就係咁自私，係我思想有問題？）但我希望大家唔好對我予取
予攜，俾番兩蚊尊重我得唔得？（係咪又想話係我自己戇居囉唻？）
放心，我冇事，未精神失常，未思覺失調，係就係有少少萬梓良上身，不
過整體唻講，我都只係想講七七四十九個字粗口咁大把唧。 無藥可救[2006MAR22]大家做「步步高」做到癲左。三色台播佢七一遊行BITE、風車台播埋佢上「百萬褲窿」......大佬，你話我知，同單CASE有乜差關係？報紙癲就話無辦法唧，電視台都癲埋一份，冇野呀嘩！ 低氣壓[2006 FEB 21]今天上班，心裡極不好受，內心深處的「低氣壓」，令人喘不過氣。這種
感覺，五年前在無記當財經記時感受過，令人完全陷於惶恐及不信任當中，任何人對你
說的幹的，都可能是假話、陷阱、圈套...... 上星期五，上級被上上上級召見，並被免去日常職務，改做別的，原本的工作由上上級
接手。擔心了很多個月的事情，都終於都發生了。
自從上上上級到步後，就與前上上級不和。前上上級認為上上上級「低能，弄權，完全
不像個管理層」，我完全認同這個說法。如今前上上級都走了，但上上上級一直都在顯
示她那公主性格，再加上那種充滿順我者昌，逆我者亡的文革式鬥爭管治手段，再加上
那張完全沒有教養的咀巴，實在令人討厭。
我相信我、上級和幾位同事，在上上上級眼中，都屬前上上級的人，所以她一直都沒有
放下成見去看待我們，加上她本身有自己的人要安插（不管這些人究竟有沒有料），所
以要她對我們好是沒可能的。我完全明白這一切事情遲早會來，不過說真的，她清黨的
進度已比我預期慢。
歷史不斷在重演，去年前上上級把前前朝的人清黨，如今我所受的，可以說是報應了。
其實我只是一個工作狂，只要有事幹，懶理老闆是「陳李張黃何，區周胡馬麥」，我都
會聽聽話話的做。我很想做好我的工作，更想保住飯碗，我今年三十一了，想不認真地
為將來打算已不行了。
如果最後我都受牽連，要出局的話，我想我一定會選擇離開這個行業，因為現在都已沒
有甚麼好留戀，那幾年遺下的，只是一幕幕令人唏噓的片段：台灣地震，立會選舉，陳
太辭職，算了罷！若我真的是個好記者，我一早就是好記者了。或許，到了七老八十，
與兒孫大話西遊時才拿出來回味吧。總好過戀棧那一時三刻的光景，卻拖累人至終生遺
憾。 |
|
|
